Titel: De zonderlinge zieëve Auteur: Raymond Clement ISBN: 90-76043-50-7 Pries € 13,50

Fragment

Yaêl, e kling hupke hoap...
D’r woar ins urges e gans kling meëdje dat nog nieks gedoa houw. Doarum houw dit kling miensjke óch nog nieks verkierd gedoa. Óch houw dit klingt nog um nieks gevroagd. Neet gevraogd um d’r te zieë mer waal doa.
Wie-s te nog mer net bij ós woars wis al jieëkerinne wie ’t mit dich zouw goa. Good natuurlik. Zouws doe dokter weëde in e groeët ziekehoes, dan zals doe alle lüj beëter make. Weëds doe advocaat, dan zals doe ’t ónrech oet de welt kriege. Mar nae, doe weëds directrice van de gruëtste teddyberefabriek en alle kinger zalle van dich inne beer kriege. Wach ins, raketbouwer zals se weëde en doe zals zörge dat de lüj op vakantie kóste noa d’r moan en alle anger planete, of deredokter en doe zals d’rvuur zörge dat nieëmes mieë gemein teëge dere zal doeë, of d’r ieësjte vrouwelike generaal deë alle krege op de welt zouw aafsjaffe.
Dienge pap en mam woare de sjtolste lüj van de ganse welt en de tied sjting toen efkes sjtil. Wie langer se d’r woars wie sjtolser jieëkerinne woeëd. Van opa’s en oma’s, uëvergroeëtopa’s en -oma’s, tantes, nónkes, neëve en nichsjke, vrung en vrundinne, sjtolser en sjtolsjer woeëde ze. Ze dachte allemoal te wete wat ging gebeure en wie ’t wieër zouw goa.
En toen ich ins good noa dich keek. Toen zoog ich dat se achter die kling eugsjkes van dich dreumdes uëver kling kleunsjkes die gans groeëte lollies oetdeelde. Doe houws de gruëtste sjpas. In die groeëte cirkestent woars doe mit gans vöal kinger. Mer d’r woare lollies zat. D’r woare óch ballonne en dere. Groeëte en klinge. D’r woare oalefante mit gans felgekluurde deëkes um en de kling lieëwe woare leef en brölde van plezeer went ze lekker durch d’r zand kóste renne. De sjuns gekluurde vuëgel koame oet de nok van ’t daak en zörgde dat de balonne neet óp gen eëd vele mer ummer wer de loch in geduujd woeëde. En de zon sjeen. Lekker werm woar ’t. Jieëkerinne lachde en woar benuujd noa ’t volgende wat ze zouwe goa mitmake. Alles woar toch de ieësjte kier en alles woar óch sjiek umdat ’t zoe nui woar. En doa woare nog mieë klone en die koame aapruttele in inne groeëte roeë brandweerauto. Ze sjpoate zich mit confetti ónger. D’r letste kloon houw inne ummer water. Dat houws se neet verwach. De druppele roetsjde langs zieng groeëte roeë naas.
Dreum mer lekker wieër. Maak dich nog mer gans lang neet druk uëver wat se van jieëkerinne weëde mós. De groeëte welt is jieëkere daag duuster en leech, mer dreum mer zoe lang se kins van de zon óp die cirkestent en lollies die se gewuën aangegeëve kries.

Kling hupke hoap, maak d’r mer inne sjoeëne dreum vaan...
Raymond Clement, Heële